NAKUGANG ang mga molupyo sa usa ka sitio sa Makilala, Cotabato Province tungod sa baktin nga gipanganak nga dunay duha ka ulo niadtong Miyerkules, Agosto 2, 2023.
Sa post sa netizen nga si Maria Dahan, niingon siya nga buhi ug himsog ang baktin sa ilang silingan nga gipanganak apan gipadede gamit ang botelya.
Tungod niini, mihatag og paglaum ang maong kahimtang nga posibleng dunay tsansa nga mabuhi ang talagsaong baktin.
Kini nga kondisyon gitawag matud pa og siyentipikanhong bicephalic o mananap nga adunay duha ka ulo nga gipanganak.
Giingon nga wala pa sa panahon ang paglambo sa maong baktin mao nga nigawas kini nga adunay duha ka ulo.
Sumala pa nga duha ka gene gikan sa anay ug ang barako dili tugma hinungdan nga gipanganak ang baktin nga duha ang ulo.
Sa pagsuwat ning balita, padayon pang giobserbahan ang mahimong samputan sa baktin nga duha ang ulo apan daghan ang naglaum nga mabuhi kini.