PADAYONG giimbestigahan sa traffic section sa Buhangin Police Station ang natigayong bangga Huwebes sa hapon, Hunyo 18, 2020, sa Diversion Road, Buhangin Davao City.
Sa inisyal nga imbestigasyon migula nga daw "domino effect" ang nahitabo diin dose ka mga sakyanan ang nalambigit.
Nagkarambola ang mga sakyanan dihang gidaro sa kargadong 10-wheeler truck nga, sumala pa, nawad-an og preno.
Pulos mga private vehicles ang nalambigit sa disgrasya. Wala hinuoy namatay apan kadaghanan sa mga sakay ug drayber nakahiagom og mga bun-og sa kalawasan.
Sumala ni Major Estrello Ramiso, hepe sa Buhangin Police Station, ilang gihan-ay ang posibleng kaso nga atubangon sa drayber sa trak.
Ang hitabo, naghatag og dugang kakulgot sa sitwasiyon sa trapiko sa dapit kagahapon.