PANABO CITY, Davao del Norte -- Nagpadala ang Bureau of Fire Protection (BFP)-Davao Region og mga personahe kauban ang siyam ka mga BFP Special Rescue Force sa Davao didto sa Caraga aron motabang sa clearing operation sa lugar human nga gikuso-kuso sa Bagyong Odette nga nagbili’g daghang distraksyon sa kadalanan ug kabalayan.
Ang pagpadala sa BFP Special Rescue Force inisyatibo ni Fire Chief Director Louie Parangan inubanan ni DCO Chief Superintendent Wilberto Rico Neil Kwan TIU ug Regional Director Chief Superintendent Sydney Besana nga gisuportahan usab ni City Fire Marshal Chief Inspector Janeth M. Leguigan ug City Local Government Operations Officers sa DILG Danilo Hernandez.
Kahinumdoman nga niadtong Disyembre 14, 2021, misulod sa Philippine area of responsibility (AOR) ang bagyo ug nagbilin kini og dakong trabahuon sama sa clearing operation mahitungod sa mga distraksyon sama sa mga kahoy o debris.
Gawas sa pagpanghinlo sa lugar, dala-dala usab sa grupo ang rescue equipments, food packs, tubig ug sanina nga magamit aron ipang apod-apod sa mga nabiktima sa bagyo.
Sa gustong mo-donate mamahimong mo-contact sa numerong 0991-363-1096 o mobisita sa City Information Office (CIO) nga nahimutang sa 2nd floor, New City Hall, Barangay Jose P. Laurel Avenue Panabo City.
Sa samang bahin, ang Regional Disaster Risk Reduction Management Council-Davao Region magpadala og mga personahe, ug mga pagkaon, equipments, ug mga medical doctors uban sa Eastern Mindanao Command nga mogikan karong buntag padung sa Caraga Region aron motabang sa mga naapektuhan sa bagyo. (Edith T. Isidro/PIA)