COTABATO CITY -- Nalisang ang mga sibilyan sa pagpabuto sa mga armadong grupo sa pagsugod sa Holy month of Ramadhan sa probinsiya sa Maguindanao.
Mismo ang mga molupyo duol sa Liguasan Delta ug SPMS Box sa Maguindanao ang nakadungog sa buto-buto sa mga armas.
Gikomperma sab sa mga opisyal sa barangay nga grupo sa Bangsamoro Islamic Freedom Fighters (BIFF) ang nagpaarak sa ilang mga tag-as nga matang sa armas.
Una na nga nagpagawas og kamandoan ang Darul Ifta sa Bangsamoro Autonomous Region in Muslim Mindanao (BARMM) nga hugot nga gidili ang pagpabuto og armas sa pagsugod ug katapusang adlaw sa puasa.
Tungod sa buto-buto sa armas nakuyawan ang mga molupyo sa mga hilit nga dapit sa Maguindanao apil na sa North Cotabato.
Una na nga nanganti ang grupo ni Shiek Esmail Abdulmalik alyas Kumander Abu Toraife nga mulusad sila og katag-katag nga pagpangatake sa pagsugod, tunga-tunga ug katapusang adlaw sa Ramadhan.
Sa kasamtangan hugtanon nga gibantayan sa awtoridad ang kalihukan sa BIFF sa Maguindanao ug sa probinsiya sa Cotabato. (Edgar Fuerzas)