BISAN og nahuman na ang kalag-kalag, nagpursige sa pag-adto sa lubnganan sa namatay nga bana ang 45-anyos nga biyuda human matud pa, giduaw siya niini kay wala makabisita niadtong Nobyembre 2.
Si alyas Elena nagbutyag dihang personal nga nahinabi sa Superbalita nga gikan siya og biyahe sa General Santos City, kauban ang duha niya ka mga anak padung sa lungsod sa Nabunturan, Compostela Valley Province aron bisitahon ang lubnganan sa kanhi mister nga napulo na ka tuig nga namatay.
“Bisan og wa mi kuwarta kay naglisod man gyud kami karon, nangutang na lang ko og mapamasahe aron makaabot mi dinhi’s Nabunturan ug akong mabisita ang lubnganan sa akong bana,” saysay sa biyuda.
Gibutyag niya sa Nabunturan sila nanimuyo kaniadto. Apan sa dihang naaksidente ug namatay ang iyang bana, napugos pag-uli sa iyang dapit sa Gensan sanglit taga didto man ang iyang ginikanan.
Giangkon sa maong biyuda nga aduna siya’y gikapuyo karon nga maoy mibuhi kaniya ug sa iyang mga anak ug kapin walo ka tuig na nga wa mabisita ang lubnganan sa iyang bana.
Gibutyag ni alyas Elena nga wa na sa iyang huna-huna ang pagduaw sa lubnganan sa mitaliwang kapikas gumikan sa kalayo ug wa siya’y ikapamasahe sa sakyanan.
Apan niadtong adlaw’ng Dominggo, Nobiyembre 3, nakamata siya alas 11 sa gabii dihang adunay nanuktok sa pultahan sa ilang balay nga sa iyang pagbangon gikan sa higdaanan maoy natimahuman ang baho sa kanhi niya bana nga napulo na ka tuig nga patay.
“Ang baho sa pahumot nga mao gyud ang iyang ginagamit kaniadto maoy akong natimahuman ug nanimbawot ang akong balahibo dihang adunay bugnaw nga hangin nga daw milukop kanako,” dugang saysay niya.
Misamot ang kahadlok nga gibati ni alyas Elena nga sa iyang pag-abli sa pultahan aron susihon kung si kinsa ang nanuktok, maoy misugat sa iyang panan-aw ang dagway sa namatay nga mister nga sumala pa daw nagkagusbat ang hitsura ug daw naghilak.
Nakasinggit sa kahadlok ang maong babaye hinungdan nga nakamata ang iyang kapuyo ug dali-dali siyang giduol.
Apan sa pagduol sa kapuyo, nawala sa iyang panan-aw ang dagway sa namatay’ng bana ug maoy mibanos pagpakita ang itom nga iring nga nagdaling mipalayo.
Sa maong hitabo, nakahukom si alyas Elena nga duawon ang lubnganan sa namatay niyang bana bisan og supak sa kabubut-on sa iyang kapuyo.
Samtang gabiyahe padulong sa lungsod gikan sa Gensan, nakatulog si alyas Elena sa bus ug naalimpungatan kay subling nakita ang dagway sa namatay nga bana nga maoy iyang katupad sa lingkuranan.
Sa sementeryo, nasuta ni alyas Elena nga natabunan sa mga sagbot ang lubnganan sa kanhi mister kay wa nay nag-atiman ug dayag nga napasagdan na lang hinungdan nga iya kining gilimpyohan, kauban ang duha niya ka mga anak.
Nakaamgo siya kinahanglan ang paghandom sa mga mipanaw nga mahal sa kinabuhi ug dili baliwalaon o kalimtan na lang sa dayon. (Dexter T. Visitacion)