TRENDING karon sa social media ang pagpakita sa usa ka dakong isda sa kadagatan sa Samal Island ug sa Davao City nga nakuhaan og video sa usa ka netizen.
Sa video sa netizen nga si K. Pastores, gipakita niini ang pagpakita sa silik o sa buko-buko sa isda nga gituohang usa ka Blue whale.
Nakuhaan kini samtang miagi ang barge gikan sa Samal Island padung Sasa 11 Pier.
Sa video mibuga og tubig ang maong isda nga gikalipay sa mga tawo nga nanakay sa barge.
Pipila ka segundos, mibuga na sab kini og tubig samtang nagpalayo ug padung sa area sa Davao Gulf.
Sumala sa mga tawo nga suwerte kuno sila nga nakakita sa pagpakita sa maong Blue whale, diin ang usa nga taga Samal Island, unang higayon suma niya nga nakakita sa maong talagsaon nga higayon sa iyang paglawig.
Ang Blue whale kon dunay scientific name nga (Balaenoptera musculus) usa ka marine mammal nga moabot sa maximum confirmed length niini nga 29.9 meters (98 ft) ug dunay gibug-aton nga moabot sa 199 tonelada (196 long tons; 219 short tons) nga maoy kinadak-ang mananap nga nailhan sukad nga naglungtad kini.