COTABATO CITY -- Naangol ang unom ka sibilyan sa pagbusikad sa bala sa bomba alas 3:00 sa kaadlawon, Abril 12, didto sa probinsiya sa Maguindanao.
Giila ang mga biktima nga sila Edres Lumambas, 51 anyos; asawa niya nga si Zahra Lumambas, 47 anyos; mga apo nga sila Sipaw Lumambas, 11 anyos; Mansur Lumambas, 5 anyos; mga paryente nga sila Maikel Kadil, 20 anyos, ug Nasrudin Biya, 36 anyos, mga molupyo sa Barangay Bagoenged, Pagalungan, Maguindanao.
Matud ni Edres Lumambas nga samtang natulog sila, kalit lang miigo sa atop sa ilang balay ang usa ka 40 MM high explosives o bala sa M79 grenade launchers.
Tungod sa kakusog sa pagbuto sa eksplosibo, naigo ang mga biktima sa tipaka niini sa nagkadaiyang parte sa ilang kalawasan.
Gisapupo dayon ang mga biktima sa ilang mga paryente ug mga silingan diin sila gipangdala sa Cruzado Medical Hospital sa Pikit Cotabato ug luwas na sa makuyaw nga kahimtang.
Natumbok na sa pamilya ni Lumambas ang mga tawo nga maoy namomba sa ilang balay nga mga miyembro sa usa ka Moro Front ug biktima lamang sila sa mga saag nga bala.
Nanawagan sab ang mga molupyo sa utlanan sa Pikit North Cotabato ug Pagalungan Maguindanao sa gobyerno nga sila matabangan sa katag-katag nga engkwentro sa magkaaway nga grupo og daghanang mga sibilyan ang mahikling. (Edgar Fuerzas)