MAS bug-at nga silot ang ipahamtang sama sa walay piyansang kaso ug mapriso sa tibuok niyang kinabuhi magpaabot sa mga indibiduwal nga masayrang sad-an sa paglapas sa Senate Bill (SB) 2432, labing nailhan sab isip Agricultural Economic Sabotage Bill.
Kini kung hingpit nang mapasar ang balaod sa tinguha nga mawagtang na ang pagpayuhot, pagpanago, pagmaniobra, ug uban pang ilegal nga kalihukan nga nagtuyok sa mga produkong agrikultura. Ang balaudnon nagtumong sab pag-anular sa Republic Act 10845 o ang Anti-Agricultural Smuggling Act of 2016, nga giisponsor ni Senador JV Ejercito.
Gikanayon ni Senadora Cynthia Villar, tsirman sa Senate committee on agriculture, food and agrarian reform, nga ang Senate bill naa pa sa "amendments" aron nga maseguro nga konstitusyonal kini.
Dugang pa niya nga ilang hupayon ang proseso sa pagpasaka og mga kaso batok sa potensiyal nga malapason sa SB 2432. Ang bag-ong implementing rules and regulations (IRR) ang gimugna sab isip basehan sa pagdakop sa mga malapason.
Ang senadora nagsulti sab nga ang pag-usab magdirekta sa Court of Tax Appeals nga maoy mogunit sa mga kaso nga naglapas sa SB 2432.
Ang Senado ug ang Ubos balay balauranan naghimo og dungan nga aksiyon aron sa paghisgut ug paghingpit sa ilang tagsa-tagsa ka mga balaudnon nga nag-usab o nag-anular sa Anti-Agricultural Smuggling Act of 2016, Republic Act (RA) 10845.
Gisertipikahan ni Department of Agriculture secretary ug President Ferdinand “Bongbong” Marcos ang maong sukdanan isip "urgent" niadtong Septyembre 21.
Gikanayon ni Marcos nga ang "urgency" gihimo alang paspas pag-aproba sa kausaban, kon diin ang kalit nga pagsaka sa presyo ug kakuwang sa agricultural goods nga posibleng nahitabo tungod sa ilegal nga mga kalihukan sama sa pagpayuhot, pagpanago, pagmaniobra ug cartel nga operasyon. (ICE)