NAGNEGATIBO na sa ikaduhang swab test result ang walo ka bulan nga buntis nga nurse sa Kidapawan City.
Ang biktima mao si PH 3671 nga nagpuyo sa Barangay Poblacion, Kidapawan City.
Una nga nagpositibo sa coronavirus disease (Covid-19) ang pasyente nga dunay travel history sa nasud Abu Dhabi, Singapore ug sa Davao City.
Gikomperma sa Department of Health (DOH)- North Cotabato ug ni Cotabato Second District Board Member Philbert Malaluan nga siya sab ang nangulo sa Covid-19 Provincial Inter-agency Task Force nga nagnegatibo sa ikaduhang swab test result ang nurse.
Ang pamilya ug close-contact ni PH 3671 nagnegatibo sab sa ilang test result.
Walay simtomas sa Covid-19 ang pasyente ug maayo sab ang kondisyon sa iyang pagbuntis.
Usa ka bulan nga na-admit si PH 3671 sa isolation facility og paggawas niya ipailawom sab siya sa dugang 14-day strict private quarantine.
Sa kasamtangan dunay duha ka recovered cases sa probinsiya sa Cotabato samtang gihulat na lamang ang test result ni PH 3989 ang ulahing confirmed positive case. (Edgar Fuerzas)