KIDAPAWAN CITY -- Nakagawas na sa balay tambalanan ang 11 sa 26 ka pasahero nga naangol human nahulog sa bung-aw ang yunit sa Mindanao Star Bus didto sa Km. 110, Barangay Amas sa nahisgutang siyudad, alas 4 sa kaadlawon niadtong Huwebes, Enero 3.
Giingong mga biktima sakay sa second trip sa Mindanao Star Bus nga dunay body number 15676 ug non-stop gikan Davao City paingon sa siyudad sa Cotabato.
Apan pag-abot sa bus sa likuon nga bahin sa national highway sa Km. 110 sa Barangay Amas, wala na makontrola sa drayber nga si Jaypee Jose ang manobela ug diretso nga nahulog sa mabaw nga bung-aw.
Abtik nga nagresponde ang mga pulis, mga sakop sa Bureau of Fire Protection (BFP), lakip na mga sibilyan nga molupyo sa maong dapit diin giluwas nila ang mga pasahero ug gidala ngadto sa Cotabato Provincial Hospital.
Minor injuries lang ang nahiaguman sa mga pasahero ug 11 niini ang nakagawas na sa ospital.
Gikanayon sa konduktor sa bus nga si Yasser Abe nga 50 hangtud 55 lang ang ilang dagan niadtong mga orasa, busa di kaayo tantong kusog.
Apan gibutyag ni Jose nga dunay kalit nga misagpa sa iyang nawong nga wala niya makita nga mora matud pa og dili ingon nato hinungdan nga wala niya makontrola ang manobela sa bus ug nahulog sa bung-aw.
Gani nasamad pa ang ilong sa drayber nga giingong tungod sa paglaparo kaniya sa tawo nga wala niya makita. Apan dunay daghang nagkanayon nga nakatulog si Jose hinungdan sa disgrasya.
Hinuon nagpaabot na og hinabang ang kompaniya sa bus ngadto sa mga pasaherong nabiktima sa disgrasya.