DAVAO DEL NORTE - Usa ka sakop sa Cafgu Active Auxiliary ( CAA ) ang nag-unay pusil sa iyang kaugalingon sa KM. 64, New Balamban, siyudad sa Tagum alas 6:30 sa buntag, Miyerkules.
Ang biktima mao si CAA Jemio Gamboa, 31, minyo, ug molupyo sa Purok 4, Sta. Emelia, Laak, Davao de Oro.
Subay sa report , usa ka taho ang nadawat sa Tagum City Police Station kabahin sa nahisgutang insidente hinungdan nga gilayon nila kining girespondihan. Apan pag-abot sa dapit, ang bktima gidala na ngadto Davao Regional Medical Center pinaagi sa mga sakop sa City Disaster Risk Reduction and Management Office (CDRRMO).
Base sa inisyal nga imbestigasyon, nagpusil si Gamboa sa iyang kaugalingon sa makausa ka higayon tumong sa dughan.
Gikanayon, base sa pahayag sa ig-agaw sa biktima nga si Lester Loar nga usa sab ka sakop sa CAA ug kang 1st Sergent Roquel Maradia nga ang biktima nag-antos sa depresyon giingong nag-unay'g pusil sa kaugalingon gamit ang kalibre .38 revolver uban sa lima ka round nga mga bala kon diin usa ka basiyo niini nakuha gikan sa iyang posisyon.
Sa paghagpat ning maong balita, padayon pang nakigtigi sa kamatayon ang biktima sulod sa balay tambalanan samtang padayon sab ang imbestigasyon sa kapulisan sa Tagum City PNP.
Kung duna kamo'y nasayrang nakasinati og depresyon ug kinahanglan nga dunay ma-istorya, ayaw pagduha-duha og pangayo og tabang. Ania ang Hopeline ug National Center for Mental Health Crisis Hotline sa Pilipinas: Hopeline PH's 24/7 hotlines: 0917-558-4673 (Globe) 0918-873-4673 (Smart) 02-88044673 (PLDT) 2919 (toll-free for Globe and TM). Sa National Center for Mental Health Crisis Hotline makontak sa 0917-899-8727 ug sa 0917-899-USAP/989-8727/989-USAP.