GIBALHOG sud sa prisohan ug giandam na ang pormal nga pagpasaka og kaso batok sa usa ka sakop sa Citizen Armed Force Geographical Unit (Cafgu) kinsa suspek sa paglugos ug pagpatay sa 10-anyos nga batang babaye sa Brgy. Dalagdag, Calinan District, Davao City niadtong Abril 7, 2023.
Giila sa Calinan Police Station ang suspek nga si Joshua Pilongo, 20-anyos, taga Purok 4 Lower, Barangay Lacson, Calinan District.
Ang suspek boluntaryong misurender kang Barangay Dalagdag Kapitan Rogelio Dela Cruz niadtong Abril 9 alas 5 sa hapon.
Giangkon niini ngadto kang Dela Cruz nga siya ang milugos ug mipatay sa biktima.
Kahinumdoman nga ang apohan sa bata nga si Clarita mao mismo ang nakakita sa patay'ng lawas sa iyang apo sa kasagingan sa Purok 5 sa Barangay Dalagdag niadtong Abril 9, alas 3 sa hapon, nga anaa na sa state of decomposition o pagkadugta.
Gisaysay sa apohan ngadto sa kapulisan nga iyang gibilin sa suspek nga kapuyo sa ilang paryente niadtong Abril 7 ang bata kay miadto siya sa Barangay Calinan Poblacion, apan sa pagbalik wa na ang bata.
Human ang ikatulong adlaw, nakita ang bata nga wa nay kinabuhi.
Ang suspek napasakaan na og kasong rape with homicide kinsa anaa na karon sa Calinan Police Station. (Uban sa taho ni Cheche Diabordo)