TODAS ang usa ka sakop sa Cafgu Active Auxiliary (CAA) sa diha nga naipit sa engkuwentro sa duha ka grupo sa Bangsamoro Islamic Armed Forces-Moro Islamic Liberation Front (BIAF-MILF) alas 4:00 sa hapon Miyerkules, Enero 25, sa Barangay Rajah Buayan, Maguindanao del Sur.
Ang CAA nga napatay ubos sa pagdumala sa 33rd Infantry Battalion, Philippine Army.
Matud ni Rajah Buayan Chief of Police, Captain Joel Lebrilla, nga nagka-engkuwentro ang puwersa sa 105th ug 106th Base Commands sa BIAF-MILF sa Barangay Bakat sa nahisgutang lungsod.
Apan ang sakop sa CAA naipit atol sa hitabo hinungdan nga namatay human makaangkon og daghang samad lawas.
Nahunong lang ang panagsangka dihang miresponde ang mga sundalo ug pulis uban ni Rajah Buayan Vice Mayor Jerry Makalay.
Sa pagsuwat ning balita, ang Central Committee sa MILF nakig-alayon na sa militar, kapulisan ug lokal nga panggamhanan aron husayon ang dumot tali sa magkaaway nga mga grupo.