MGA 50 ka indibiduwal gikan sa 22 ka mga buhatan sa City Government of Davao nipailawom sa tulo ka adlaw nga Disaster Risk Reduction and Management Course for Public Sector sa City Disaster Risk Reduction and Management Office (CDRRMO).
Gikan Septyembre 13 hangtud 15, ang mga kawani nipailawom sa pagbansay sa Ritz Hotel, Davao City. Kini nahisubay sa implementasyon sa Disaster Risk Reduction and Management (DRRM) nga sundon sa matag buhatan.
Naglaum si CDRRMO head Alfredo Baloran nga ang maong pagbansay sa mga empleyado mahimong kabahin sa disaster action team sa ilang matag buhatan.
“Ang importante ani nga training is to give an orientation to the participants on how they are going to manage in times of a disaster, especially kung naa sila sa ilahang mga offices,” pagtin-aw ni Baloran.
Buot sa CDRRMO nga isilsil ngadto sa pampubliko nga empleyado ang kritikal nga impormasyon, katakus, apil na ang pangisip nga makatabang kanila mahimong disaster action team sa ilang mga buhatan.
Gawas sa pagka-miyembro sa disaster team, gidasig sab sila sa CDRRMO nga ipaambit ang ilang kahibawo ngadto sa ilang mga kaubang empleyado aron sila pud mahibawo sa mga butang nga kinahanglan nila kung makasinati na sila sa natural disaster. (RGP)