ANG Davao City Health Office Dispensary Section nanawagan sa mga trabahante gikan sa hingtungdan nga sektor sa serbisyo nga i-renew ang ilang mga health card tungod kay gitumong niini nga masakop ang ilang target nga 100,000 ka mga health cards para sa 2023 diin kini nga mga cards gi-release ug giproseso didto sa Gaisano Ilustre.
Sumala ni Dr. Greggy Mark Yee kinsa maoy CHO Dispensary Section head, Biyernes, Enero 20, 2023, nga kini nga mga cards gi-release ug giproseso didto sa Gaisano Ilustre.
"More than 10,000 ang nakakuha. Ang target nato this year is 100,000 para ma-beat nato ang last year nga record," ingon ni Yee.
Lakip sa gikinahanglang makakuha og health card mao ang mga nagtrabaho sa food service industry, mga security guard, ug mga massage therapists.
Matud pa ni Yee nga ning milabay'ng mga adlaw, nakatala sila og pagsaka sa gidaghanon sa mga empleyado nga nakaproseso sa ilang mga health cards, diin 1,400 ang pinakataas nga ihap matag adlaw.
Dugang pa niya nga ang renewal mahimong matapos sa Marso-Abril depende sa gidaghanon sa mga kliyente diin gipasabot niini nga importante kaayo ang pag-renew sa health card.
"Importante ni sya kay aside sa dili sila madakpan o [masirado] ilang company. Kailangan nila ma-train og usab labaw na sa atong food handlers. Dapat kabalo sila unsay dapat ug mga dili sa pagprepare og food, para sa non-food pud, aron ma-aware sila sa tama nga proseso," niya pa.
Ang nag-unang kinahanglanon alang sa health card mao ang fill-up nga application form, cedula, opisyal nga resibo gikan sa City Treasurer’s Office/Osmena Park/ Cashier on site, ug mga resulta sa laboratoryo nga mahimong magkalahi depende sa matang sa trabaho.
"For the whole year ang health card nato is Php 50.00 excluding the laboratories na na siya. Ang laboratories kamo bahala asa magpalaboratory pwede ta mahalon, pwede ta sa kaya-kaya, as long as legit siya nga laboratory wala gyud ta’y problema," ingon sa opisyal.
Aron mas sayon ang pagproseso, giawhag ang mga Dabawenyo nga ipresentar ang mga kinahanglanon sa site.
Gipahinumdoman usab sila nga timan-an ang pangalan sa ahensya tungod kay lakip kini sa gikinahanglang detalye nga makita sa health card.
Para sa dugang pangutana, detalye, ug anunsyo, mahimong mag-message ang mga Dabawenyo sa Facebook page nnga CHO Dispensary. (Uban sa taho sa CIO)