BISAN pa sa mga paningkamot sa nagkalain-laing nagpakabana nga ahensiya sa gobyerno sa pagsumpo sa paglapas sa tawhanong katungod, ilabi na sa kababayen-an ug kabataan, aduna gihapoy natala nga paglapas niini sa Davao Region.
Tungod niini, gikonsidera kini nga makaalarma ni Commission on Human Rights (CHR) sa Davao Regional Director Atty. Keysie Gomez.
Gipasabot ni Gomez nga usa o duha lang ka paglapas sa tawhanong katungod nga matala makonsidera na kini nga makaalarma.
Apan gikanayon sa opisyal nga dunay mga programa ang ilang komisyon nga nagtumong pagpanalipod ug pagpasiugda sa tawhanong katungod ug paghatag og dinaliang mga serbisyo ngadto sa mga kliyente.
Hinuon, giangkon ni Gomez nga dili paigo ang ilang "resources."
Kini gumikan kay ang ilang komisyon sa rehiyon duna la'y 2 ka abogado ug 6 ka imbestigador. Aron nga maayudahan kini, gipailawom sa komisyon ang mga barangay ug komunidad sa pagbansay-bansay aron sila na mismo ang ilang kauban sa pagtubag sa mga paglapas sa tawhanong katungod.
Kini gumikan kay way "field presence" ang CHR 12 sa mga probinsiya, hinungdan nga ang barangay o komunidad mismo ang mohatud og taho ngadto kanila.