BISAN layo ang ilang mga balay, wala kini igsapayan sa mga batang lumad sa tribong Matigsalog ug Uvo Manuvo uban sa ilang mga ginikanan aron makaadto sa gihimong medical mission ug gift giving niadtong Dominggo, Disyembre 1, sa Barangay Marilog Proper, Marilog District, Davao City.
Ang programa gipangunahan sa Criminal Investigation and Detection Group (CIDG)-Davao City uban sa Sta. Ana Davao Rotary Club ug ubang pribadong sektor ug indibidwal.
Dala sa grupo ang mga regalo, mga tambal ug mga pagkaon nga sarang gikalipay sa dul-an 250 ka mga residente.
Nalingaw sab ang mga batang lumad sa magician nga dala sa CIDG-Davao City sa panguna ni CIDG-Davao assistant chief, Police Chief Inspector Milgrace Cajes Driz.
“Gift giving ni siya ug medical mission diin nagsimbolo kini sa pagbalik nato ngadto sa uban sa mga grasya nga atong nadawat,” ingon ni Driz.
Nagpasalamat sab si Matigsalog Tribal Chieftain Rody Mande nga usa ang iyang komunidad sa napili sa grupo.
“Dako kaayo atong pasalamat sa mga naglangkob niini nga aktibidad labi na sa CIDG-Davao ug sa Sta. Ana Davao Rotary Club, unta sa mosunod pa nga katuigan, anhion gihapon kami nila diri,” ingon ni Mande.
Nanguli ang grupo uban sa kalipay ug gugma diin napaambit ang ubang grasya. Nalipay sab ang mga residente sa ilang giingong talagsaong regalo nga miabot sa ilang dapit.