Criminology student samdan human gihapak og bato ang ulo

COMPOSTELA, Davao De Oro -- Hustisya ang gisinggit sa pamilya ug kabanay sa criminolgy student nga gipareglahan sa dalan sa Brgy. Poblacion alas 2:00 sa kaadlawon niadtong Sabado, Septyembre 16, 2023.

Kini ang gibutyag sa usa ka Jade Labiste, kauban ug suod nga higala sa biktima nga si Jhon Lester Alibangbang, 18, criminology student sa pribadong tunghaan sa lungsod kinsa molupyo sa Brgy. Naboc, Monkayo, Davao de Oro.

Sa saysay ni Labiste dihang personal nga nahitabi sa SuperBalita, giingon niini nga niadtong higayona nagkuyog sila sa biktima nga si Alibangbang uban sa lain pa nilang higala nga ginganla’g Denmark Ugsan gikan nga nanuroy ug misaksi sa kalingawan sa Brgy. Poblacion nga dunay pasundayag sa giingong impersonator ni Taylor Swift nga ginganla’g Maya Sympha.

Tungod sa maong pasundayag wala dayon sila makauli, ilabi na nga ilang nakaila ang tulo ka miyembro sa lesbian gay, bisexual, transgender, and queer (LGBTq) ug nagpahatud kanila sa gipuy-ang boarding house.

Matud pa nga human nahatud sa maghigala ang mga LGBTq, nagbaktas sila sa dalan paingon sa giparkingan sa ilang motorsiklo.

Apan sa kalit lang dunay matud pa nihapak sa likod ni Labiste nga giingong tulo ka mga lalaki nga nag-angkasay sa laing motorsiklo ug mipaturatoy gilayon sa pagpalayo.

Tungod niini, mga maghigala daling nanguli sa tagsa-tagsa nila ka boarding house kon diin giuna og hatud si Ugsan.

Matud pa nga sa pag-abot sa boarding house ni Ugsan, gihatud ni Labiste sa may tarangkahan ang higala samtang si Alibangbang nagpaabot daplin sa dalan uban sa gisakyang motorsiklo.

Apan mitungha na sab ang tulo ka mga lalaki nga nag-angkasay sa motorsiklo nga maoy nihapak kang Labiste.

Mga suspek kinsa gihulagway nga naa sa pangedaron nga 20-anyos pataas , laguon ang panamit ug ang usa wa’y sapot sa pang-itaas.

Giingon ni Labiste nga nakita niyang naggunit og bato ang usa sa mga suspek ug subling gihapak ang bato ngadto sa ulo ni Alibangbang, dayong mipaturatoy na usab padagan palayo sa gisakyan nilang motor.

Sumala pa nga sa dihang niabot na ang ambulansiya , naa na sab ang mga pulis ug nagtapok ang daghang mga tawo, apan naa sab ang tulo ka mga suspek nga sakay gihapon sa motorsiklo.

Giingnan dayon ni Labiste ang mga pulis ug gigukod ang mga suspek, apan wala na hiabti.

Sa paghagpat ning balita kagahapon, anaa pa sa tambalanan ang biktima sanglit matod pa nakaangkon kini og dakong liki sa ulo.

Naglaom karon ang mga kabanay sa biktima nga madakpan na ang mga suspek.