MIDANGOP na karon sa bisan asa nga grupo ug ahensiya aron matabangan nga mapadali ang imbestigasyon sa usa ka Pinay nga taga Davao City nga nagtrabaho sa Jeddah sa Kingdom of Saudi Arabia.
Saysay ni Nisha Cartagena Erediano, ang igsuon sa Pinay nga si Prisciliza Mae Cartagena, alyas Payat, 33-anyos, taga Ponce Street, Barangay 28-C, Davao City nga unta ilang makab-ot dayon sa hinanaling panahon ang hustisya.
Ang nasampit nga Pinay napalgan na lang nga wala na'y kinabuhi ubos sa usa ka building sa Jeddah kinsa giingong nahulog gikan sa ikalimang andana.
Dugang nasayran, Hulyo 21, 2023, miadto ang biktima sa gipuy-an sa usa ka Pinay sab aron dunay kuhaon, uban ang usa pa ka Pinay, ug gikan niadto, wala na nakauli ang biktima ug nakita na lang kini nga wala nay kinabuhi ubos sa building.
"Panawagan lang namo nga unta mapadali ang imbestigasyon, ug makab-ot gyod namo ang hustisya sa akong igsuon," ingon ni Erediano sa Superbalita Davao Miyerkules sa hapon pinaagi sa telepono.
Gisaysay sab sa igsuon nga daghan sila og espikulasyon sa nahitabo, apan dili una nila kini pangunahan aron dili matandog ang gihimong imbestigasyon sa foreign agency ug sa awtoridad didto sa Jeddah.
Ang biktima usa ka domestic helper kinsa mag-upat ka tuig na karong Nobyembre 19, 2023 sa agency nga gisudlan niini isip tiglimpyo og panimalay sa Jeddah.
"Tiglimpyo sila og balay, naa silay agency ug mag-upat ka tuig na unta karong November 19, 2023, mouli na unta siya sa Davao, ug nag-talk gyod me nga iya daw surprise-son ang iyang duha ka anak nga 9-anyos, ug 14-anyos nga naa karon sa Tagum City, sa mama sa papa sa mga bata," ingon ni Erediano.
Ang patay nga lawas sa biktima kasamtangan nga naa pa sa Jeddah sanglit dunay dugang 21-diyas ang hulaton alang sa imbestigasyon.
Sa kasamtangan, ang Overseas Workers Welfare Administration-Central Office naghimo na og makuti nga koordinasyon sa foreign agency ug mismong sa Philippine Embassy sa Jeddah sa nahitabo aron makab-ot sa hinanaling panahon ang hustisya sa Dabawenya nga namatay.