Dance instructor nga giingong nimolestiya sa tulo ka mga bata sa Sitio Taytayan, Brgy. Buhisan, siyudad sa Sugbo, gipusasan sa alas 11:30 sa buntag sa Martes, Hulyo 19, 2022.
Si Christopher Pascual, 53, minyo, residente sa maong lugar, napusasan subay sa warrant of arrest sa kasong statutory rape nga giluwatan ni Judge Stephen Ian T. Belacho sa Regional Trial Court (RTC) 7, Branch 22 sa Cebu City nga gipetsahan og Hulyo 14, 2022.
Si Maj. Janilito Marquez, hepe sa Labangon Police Station nga nahinabi sa Superbalita Cebu, nagkanayon nga moabot ngadto sa tulo ka mga menor de edad ang ningsang-at og reklamo batok sa suspek.
Dugang ni Marquez nga wala pay labot ang ubang mga biktima nga gikatahong nag-andam usab sa pagpasaka og kaso batok kang Pascual.
Matud ni Marquez, uban nila sa pagsikop sa suspek ang mga personnel sa Criminal Investigation and Detection Group (CIDG) Mandaue Field Unit, Regional Intelligence Unit (RIU) 7.
“Kanang iyang tudloag sayaw sagad menor, 12 ngadto sa 14 anyos. Iyahang suguon sa pagpalit og candy ang uban unya dayon hilabtan,” dugang ni Marquez.
Apan ang suspek hugtanong nihimakak sa mga pasangil batok kaniya.