DEAD on the spot ang usa ka opisyal sa pulis human madisgrasya ang iyang gisakyang motorsiklo alas 5 kagahapon sa buntag, Oktubre 14, didto sa Lower Tamugan, Marilog District, Davao City.
Sa impormasyon gikan sa Marilog Police Station, nasayran nga ang biktima mao si Police Lieutenant Aliper dela Camara Mendoza, taga Lanao del Sur ug nadestino sa Police Regional Office-Northern Mindanao.
Subay sa inisyal nga imbestigasyon sa traffic section sa Marilog police, nasayran nga usa ka Saddam truck ang nakabangga sa motorsiklo nga gimaneho sa biktima sa dangog nga dalan sa Lower Tamugan.
Dugang nasayran nga gikan sa Lanao ang biktima diin padung na kini sa Regional Training Center-Davao sa Mintal, Davao City kon diin nag-schooling alang sa Public Safety Officers Basic Course.
Hinuon, boluntaryo nga mitahan sa kaugalingon ang drayber sa trak sa Marilog police.
Ang patay nga lawas sa biktima giasikaso na sa pagpahiluna sa iyang pamilya.
(Jeepy P. Compio)