BALHOG sa prisohan sa Digos City Police Station ang usa ka lalaki nga alegasyong tigpayuhot og ilegal nga druga atol sa buy-bust operation alas 4:51 sa hapon, Hulyo 22, 2023, sa Purok 5, Barangay Matti, Digos City.
Ang operasyon gipangunahan ni Police Captain Diosdado Niones II ubos sa sa superbisyon ni Police Lieutenant Colonel Hamlet Lerios, kauban ang Regional Special Operation Group (RSOG) XI nga gipangunahan ni Police Captain Wilquin Enciso ubos sa superbisyon ni Police Lieutenant Colonel Jacy Jay Francia.
Giila ang suspek nga si alyas Rey, 30-anyos, taga Pikit, North Cotabato ug dayo lamang sa lugar aron mobaligya og gidiling druga.
Ang suspek napalitan og usa ka pakite ug nakuhaan sa laing upat pa ka mga pakite sa gituohang shabu.
Nakuhaan sab kini sa usa ka pakite sa pinaugang dahon sa marijuana ug mga shabu paraphernalia.
Anaa sa 0.8 grams ang gibug-aton sa shabu kantidad og P12,000 samtang ang marijuana motimbang sa 1.7 grams kantidad og P525.