WAY natalang mga insidente nga makatugaw sa kahusay ug kalinaw
sa unang adlaw sa bar examamination nga gipahigayon sa Ateneo de Davao University-Senior High School sa Bangkal, Davao City.
Kini maoy gibutyag ni Davao City Police Office (DCPO) chief, PCol. Alberto Lupaz, Miyerkules, Septyembre 20, 2023.
“So far, hapsay ang atoang first day sa three-day schedule nila nga Bar Exam and we are continuously implementing tight security, everyday until the last day,” pagklaro sa opisyal.
Gisulti sab sa DCPO ngadto sa mga tigbalita nga moabot sa 274 ka mga pulis ang gideploy sa unang duha ka adlaw sa bar exams niadtong Septyembre 17, ug 20, ug dugangan pa ngadto sa 374 sa katapusang adlaw sa Septyembre 24.
Sa pikas bahin, gisulti sab ni PMaj. Rose Aguilar, Station Commander sa Talomo Police Station, nga nilampos ang eksaminasyon tungod kay way natalang reklamo gikan sa mga examinee.
“Malinawon ug siyempre successful ni nga examination kay wala man tay natala nga eventualities or or untoward incidents or mga
complaints and mga kasikas nga angay ikabalaka,” butyag niya.
“Hopefully sa third day lauman gihapon nato nga mao gihapon ang participation sa mga bar takers at the same time sa mga well-wishers,” pahayag niya.
Kahinumdoman, gidili sa Korte Suprema (SC) ang "salubong" ug "send-offs", ug uban pang panagtigum sulod sa bisinidad sa pasulitan nga lugar.
Ang pahimangno gipagawas sa buhatan sa lokal nga panggamhanan, law enforcement sa lugar nga nagmando sa istriktong pagpatuman niini pinaagi sa paglimpyo sa lugar sulod sa 70 metro gikan sa perimeter sa ADDU-SHS sa nahisgutang mga petsa ug mosupak pagasilotan.
Sumala sa datus, adunay 14 ka mga testing sites sa tibuok nasud, apan ang ADDU-SHS ug Xavier University sa Cagayan de Oro City lang naa sa Mindanao.