USA ka opisyal gikan sa Davao City Police Office (DCPO) nagsulti nga ang mga kasong lugos niubos og 42 porsiyento sa dakbayan.
Gikanayon ni DCPO spokesperson Police Major Catherine Dela Rey nga gikan sa Enero hangtud sa Mayo 2023, nakatala sila og 43 nga kasong lugos, nikubos og 42 porsiyento gikan sa 72 ka kaso gikan sa samang panahon sa miaging tuig.
Giingon sa opisyal nga nakatampo sa pagkubos sa ihap mao ang kalihukang "crime prevention" nga gihimo sa DCPO.
“Maattribute nato ni sa atong mga crime-prevention na mga activities and anti-criminilaty programs like sa rape naa tay Oplan Kilos, kung sa robbery ug theft naa tay Oplan Rats Tugis,” tug-an ni Dela Rey atol sa I-Speak media forum sa Davao City Hall, Hunyo 8.
“Then ang patrolling nato sa mga areas and then sa mga tourist spots naa man tay tourist police,” dugang pa niya.
Apan giingon ni Dela Rey nga bisan pa sa pagkubos, mga kasong lugos makaalarma gihapon, kay nanguna kini sa focus crimes nga mga kaso sa Davao City.
“Kung tan-awon nimo na siya sa eight focus crimes, siya japon ang pinakataas, mao nang padayon ang atoang advocacy through Oplan Kilos,” pag-esplikar ni Dela Rey.
Ang walo ka focus crimes mao ang pagpatay, homicide, physical injury, lugos, kawat, tulis, kawat sa sakyanan ug motorsiklo.
Sayo niini nga taho sa SunStar Davao, gisulti ni Dela Rey nga ilang gipakusgan ang kampanya sa Oplan Kilos batok sa kasong lugos sa nagkadaiyang bahin sa siyudad, isip kabahin sa kampanya sa DCPO aron pahugtan ang "police and community efforts in the strategic measures in combating rape and other sexual abuse against women and children”.
Ang kampanya nga gitawag og “Kababainhan/Kabatan-onan/Kalalakin-an Igiya Laban sa Pagpanglugos,” nagtumong sa pagtubag ug pagpakubos sa mga kasong lugos sa dakbayan.