GIPASIGARBO sa Davao City Police nga walay bisan usa ka pulis sa Davao City ang nadakpan nga anaa sa impluwensiya sa illegal na drugas.
Kini ang gibutyag ni Davao City Police Office (DCPO) spokesperson Police Major Catherine dela Rey atol sa interview niini sa Davao City Disaster Radio, Hunyo 5, 2023.
Sumala ni Major Dela Rey nga walay bisan usa ka pulis nga sakop sa DCPO ang nadakpan nga anaa sa impluwensiya sa illegal nga drugas.
"Wala [may mga nadakpan na mga pulis na naga-illegal drugs] and hopefully ma-maintain," ingon ni Major Dela Rey human nga gimando ni Department of Interior and Local Government (DILG) secretary Benhur Abalos nga dunay plano ang ahensiya nga ipailawom sa random drug testing ang mga personahe nga anaa sa mga local government units (LGUs) ug mga ahensiya sa gobyerno ubos sa DILG, niadtong Hunyo 2.
Gikataho nga si Abalos nagkanayon nga higpit nga ipatuman sa DILG ang random drug testing nga gikinahanglan ubos sa Republic Act (RA) 9165 o ang Comprehensive Dangerous Drugs Act of 2002.
Ang tanang LGUs (lakip ang mga barangay, lungsod, siyudad, ug probinsiya), Philippine National Police (PNP), Bureau of Fire Protection (BFP), ug Bureau of Jail Management and Penology (BJMP) ubos sa mandato sa DILG.
Ang National Commission on Muslim Filipinos, National Police Commission, National Youth Commission, ug Philippine Commission on Women ubos usab sa DILG.
Isip tubag ni Abalos, si Dela Rey niingon nga ang DCPO, nga gimando sa PNP ug Police Regional Office - Davao Region (PRO-Davao) nihimo na og random drug test sa ilang mga personahe.
“Bisa'g wala pa nang directive ni Secretary Abalos, ang Philippine National Police naa mi internal cleansing so naa jud mi gina-conduct na random drug tests sa mga personahe sa Police Regional 11 specifically diri sa Davao City Police Office so naa tay ginaconduct na random drug test,” ingon ni Major Dela Rey.
Dugang sa opisyal, “Although kabalo mi anytime naay drug test, surprise lang ang day ug ang time... as law enforcers dili jud dapat mi ma-involve sa illegal drug trade, paggamit sa illegal na druga,” ingon sa opisyal.
Gihatagan og gibug-aton sa tigpamaba sa DCPO nga mahimong dismissible offense ang mga pulis nga masakpan sa druga o ubos sa impluwensiya sa ilegal nga druga.
Gitambagan usab ang mga police station commander nga manubag sa ilang mga personahe.
“Kung naay mag-positive sa isa ka personnel isa na siya sa one-strike policy pwede siya ma-relieve sa iyang position, apil station commander, maong isig bantayay mi," butyag ni Dela Rey.
Si Major Dela Rey nga ang DCPO padayong nagpahinumdom sa tanang pulis nga maglikay sa druga kay dili kini mosangpot sa bisan unsang positibong resulta - makadaut lamang kini sa kaugmaon sa pamilya. (JPC/Ian Carl Espinosa)