DEAD on the spot ang usa ka water delivery boy human pusila sa usa ka aktibo nga sundalo dihang iya kining nakalalis Dominggo sa hapon, Hulyo 19, 2020, didto sa Westeria Street, Phase 3, Deca Homes Esperanza, Barangay Tigatto, Buhangin District, Davao City.
Ang biktima nailhan sa kapulisan nga si Ronel Tagadon Mabandos, 37, lumad nga taga Manay, Davao Oriental ug residente sa maong subdivision.
Giila sab sa kapulisan sa Buhangin police ang suspek nga si Dino Demegilio Lambayon, 44, minyo, ug aktibo nga miyembro sa Armed Forces of the Philippines (AFP) ubos sa 1003rd brigade ug residente pud sa Deca Homes Esperanza.
Sa imbestigasyon, nigula nga samtang miagi ang biktima uban sa driver niini nga si alyas Joy-Joy, iyang nakalalis ang suspek sa wa matino nga rason.
Sa tunga-tunga sa ilang lalis, mikuha og pusil ang sundalo dayon iyang gipusil sa biktima hinungdan sa kamatayon niini nga nahagba sa tugkaran sa suspek.
Nakuha sa crime scene ang mga basiyo sa bala sa Glock 17 caliber nga maoy gigamit sa suspek sa krimen.
Hinuon boluntaryo nga mitahan sa kugalingon ang suspek samtang giandam na ang pagpasaka og kaso kaniya didto sa korte.