MAAYONG adlaw, mga Super Suki.
Maihap na lang sa mga tudlo, magsaulog na ang kalibutan sa gitudlo nga adlaw sa pagkatawo ni Jesus, ang manunubos nga nagpakatawo ug gilansang sa krus.
Maayong pagkadawat sa mga katiguwangan ang pagtulon-an nga gidala ngari sa atong nasud ni Ferdinand Magellan, ang mga tulumanon nga gitudlo sa mga pangulo sa simbahan ug maoy namat-an nga mga buhat ug tradisyon sa kadaghanan nga midawat sa Kristiyanismo sa tibuok kalibutan.
Gidunganan sa pagpaluag sa mga tulumanon ug restriksiyon sa Covid-19, naghugop na karon ang katawhan diha sa mga malls ug sa mga dapit suroyanan, apil ang mga nagasugod pa'g pangandam aron saulogon ang Pasko luyo sa kapit-os sa panahon tungod sa virus.
Sa labing tinuod, walay piho nga petsa nga mabasa sa Biblya nga mahimong basihan sa pagsaulog sa Pasko kay daklit lang ang paghisgot mahitungod sa pagkatawo ni Jesus.
Mas detalyado pa ang sugilanon sa iyang kamatayon, lakip sa nakarekord ang mga adlaw, bulan ug oras sa iyang pagkamatay kay sa kasaysayan sa iyang pagkatawo nga gipatuo kanato nga Disyembre 25 kuno.
Gipasantop sab sa katawhan nga ang bulan sa Disyembre, bulan sa pagmaya hinungdan nga ang halos sa tanang dapit, atong makita ang daghang kausaban samtang pasulod na ang bulan sa Pasko.
Mingaw ang pagsaulog kon walay handa, walay mga pagkaon sa lamesa sa pagsugat sa Disyembre 25.
Aron pagtuman ug makasabay sa dagan sa panahon, dili igsapayan sa uban nga mangutang aron lang dunay pagkaon nga saluhan ang pamilya ug magsaulog sa simple nga paagi kay sa magtan-aw sa silingan nga nagamaya sa pagsaulog.
Hinuon, nahimo naman nga kabahin sa kinabuhi sa Pinoy ang pagpangutang tungod madiskarte ang Pinoy.
Nagatan-aw ang atong gobyerno sa dakbayan sa Davao nga mahimong malipayon ang matag panimalay, apan sa gihapon, daghan ang bagulbol nga gilisud-lisud kuno sila kay gipaagi pa sa Davao QR code ang pagrehistro sa katawhan usa makakuha sa pinaskohan.
Sa milabay nga katuigan nga gipaagi sa mga opisyal sa barangay ang pagpanghatag sa balde-balde nga pinaskohan, daghan gihapon ang mulo kay kuno paryente sa mga opisyal lang ang nanghakot samtang ang uban walay nadawat.
Atong masabot nganong mangutang na lang ang uban aron lang makasaulog dungan sa kadaghanan. Ang apan lang tungod ang Pasko nga atong ginasaulog wala diay insakto nga petsa diha sa kasaysayan.