GI-HOLD una ang implementasyon sa SafeDavao QR (DQR) code ug dili una kini mandatory subay sa gibutyag sa service provider niini.
Kini ang gipahibalo ni Davao City Mayor Sara Duterte-Carpio atol dcDR 87.5 FM, kagahapon.
"Yes gi-hold sa nato ang mandatory implementation sa karon. Dili siya mandatory sa pagkakaron kay ingon sa service providers, ang ubang gadget dili pa siya magamit like Apple. Ang pwede pa lang is Android na naay internet connection," ingon sa mayor.
Una niini, nahatagan og lugway nga sa Nobyembre 23, 2020 sugdan ang pagpatuman niini gikan sa naunang petsa nga Nobyembre 7.
Giulan sab kini og reaksyon sa social media gumikan sa natigayong wala paggana sa online registration nga maoy hinungdan nga daghan ang napulaw kay nagpinaabotay kanus-a mabalik.
Sa pagbalik niini pipila ka adlaw una ang Nobyembre 23, daghan ang naka-register apan pag-abot sa deadline, mihatag sab dayon og kamandoan ang mayor nga ipa-hold una kini nga gikalipay sab sa pipila nga wala pa naka-register. (Jeepy P. Compio)