PATAY ang usa ka drug pusher sa anti-illegal drug operation sa mga awtoridad alas 5 sa buntag, Dominggo, Nobyembre 15, 2020, sa probinsya sa Cotabato.
Giila ang suspek nga si Randy Rodriquez Montaño, 45, usa ka construction worker ug nagpuyo sa Purok Everlasting Barangay Poblacion, Matalam, North Cotabato.
Sumala kang Cotabato Police Provincial Director Colonel Henry Villar nga nagpahigayon og drug buy-bust operation ang mga sakop sa Regional Police Drug Enforcement Unit 12 ug Matalam Municipal Police Station duol sa gipuy-an sa suspek.
Apan nakamatikod si Montaño nga mga pulis ang iyang katransaksiyon, hinungdan nga mihulbot kini sa iyang pusil ug nagpabuto.
Narekober sa suspek ang siyam ka pakite sa gituohang shabu, marked money, drug paraphernalia, mga bala, usa ka .22 revolver ug usa ka kalibre .45 nga pistola.
Nahibaloan nga kanhi na nga misurender si Montaño pinaagi sa Tokhang apan mibalik sa pagpamaligya og shabu. (Edgar Fuerzas)