TUGTAN na sa Department of Social Welfare and Development (DSWD) Davao ang awtorisadong indibiduwal nga makadawat og social pension sa senior citizen-beneficiaries aron malikayan na ang insidente human nga usa ka 62-anyos nga babaye nakuyapan ug namatay samtang naglinya aron nga mokuha sa iyang tabang pinansyal sa Barangay Bunawan, Davao City.
Niadtong Mayo 22, ang DSWD social pensioner nga gipanganlan og Angelita Parami nakuyapan ug namatay atol sa payout didto sa Barangay Bunawan Covered Court niadtong Biyernes sa buntag, Mayo 15.
Gidali og tabang sa mga health workers ang ginang apan namatay gihapon siya.
"Among ginapaabot ang among kasubo sa pagkamatay sa usa ka senior citizen nga nikuha sa iyang social pension sa Barangay Bunawan, Davao City," pahayag sa DSWD Davao.
Gisulti sa DSWD nga nagpatuman sila og polisiya nga nagtugot sa mga awtorisadong representante nga makakuha sa tabang sa mga benepisyaryo bisan og wala sila aron di na sila maglisud nga mahimong hulga ngadto sa ilang kondisyon sa panglawas.
"Kami nagahangyo sa atong mga social pensioners nga likayan usa ang paggawas ug personal nga pagkuha sa ilang social pension. Atong gitugutan ang mga awtorisado nga miyembro sa pamilya nga mao ang mokuha sa pension. Kini aron malikayan ang dili maayo nga mga panghitabo," dugang DSWD Davao.
Nipasalig ang DSWD Davao nga motunol sa gikinahanglan nga tabang ngadto sa namatayan nga pamilya.
Ang Social Pension Program gitumong nga makahatag tabang ngadto sa mga "indigent older persons" base sa Expanded Senior Citizens Act of 2010 o ang Republic Act 9994.
Ihatag kini pinaagi sa "semestral basis" sa tag P3,000 matag semester. Atol sa general community quarantine (GCQ), mga senior citizens gidid-an nga mogawas sa ilang mga pinuy-anan tungod gikonsidera sila isip high risk sa makamatay nga epekto Coronavirus disease. (JCR)