BASA nga atop maoy hinungdan sa kamatayon sa electrician human nakuryetihan alas 2:05 sa hapon, Lunes, Mayo 22, 2023, sa Libungan, probinsiya sa Cotabato.
Giila ang biktima nga si Junrel Fuentes Amara, 38, electrician sa Market Economic Enterprise Development Office nga nagpuyo sa Barangay Gumaga, Libungan.
Sumala ni Libungan Chief of Police, Major John Minidel Calinga, nga giayo ni Amara ang koneksiyon sa electrical line sa fruit stand sa palengke sa Barangay Poblacion sa lungsod apan sa dihang nitunob na kini sa atop sa fruit stand, kalit lang kining nikirig tungod sa kuryente.
Pagresponde sa mga kauban ni Amara ug mga sakop sa Municipal Disaster Risk Reducation and Management Office (MDRRMO) sa Libungan dali nilang gipalong ang linya sa kuryente sa palengke.
Gidali sab nila og dala ang biktima ngadto sa Mount Blessing Hospital apan pipila ka gutlo ang nakalabay, nakabsan kini sa kinabuhi.
Sa pagsusi sa mga linemen sa Cotabato Electric Cooperative (Cotelco-PPalma), uban ang kapulisan, nasuta nga basa ang atop sa fruit stand tungod sa bag-o lang pagbundak sa ulan ug nasangit ang napanit nga live wire sa kuryente.
Nagpaabot dayon og hinabang si Libungan Mayor Apol Cuan sa pamilya sa biktima ug nagpasidaan sa mga electrician sa lokal nga panggamhanan nga nga mag-amping kanunay.