DAGHANG pakite sa gituohang methamphetamine hydrochloride kon shabu ug .45 nga pusil ang narekober sa kapulisan sa Bunawan Police Station atol sa drug bust alas 10 sa buntag Martes, Marso 3, sa Purok 2 Matarlo, Barangay Mahayag, Bunawan, Davao City.
Ang Bunawan PNP nag-ila sa dinakpan nga si Rafael Lucariza Bargayo, alyas Jun Cassie, 37, ug residente sa Purok 3 Kasilak, Barangay Mahayag, Bunawan.
Nasayran nga dugay-dugay nang nakadawat og impormasyon ang Bunawan PNP sa pagpamaligya og gidili nga droga sa suspek, hinungdan nga gikasa ang anti-illegal drug operation.
Atol sa operasyon siyam ka mga pakite sa gituohang shabu nga dunay street value nga P680 mil ug usa ka .45 nga pistola ang nakuha sa iyang posisyon.
Sumala ni Major Noel Villahermosa, ang hepe sa Bunawan Police Station nga nadakpan na kaniadto ang suspek sa kalapasan gihapon sa droga ug karon mibalik na sab sa pagpamaligya.
Ning kasamtangan ang suspek, gibalhog sa selda sa Bunawan PNP samtang giandam ang kaso nga ipasaka kaniya didto sa korte. (Jeepy P. Compio)