COTABATO CITY -- Gidakop sa mga awtoridad ang usa ka kanhi lokal opisyal sa probinsya sa Maguindanao alas 2:20 sa hapon niadtong adlaw nga Lunes.
Giila ang suspek nga si Kamid Buisan, kanhi vice-mayor sa Talitay, Maguindanao.
Matud ni Cotabato City Police Director Colonel Richard Fiesta nga pasulod sa dakbayan si Buisan gikan sa Maguindanao sakay sa iyang pick-up.
Pag-abot ni Buisan sa Marine Battalion Landing Team (MBLT-2) detachment sa Barangay Tamontaka Dos, Cotabato City, nasiplatan siya nga dunay dala nga armas.
Gipakanaog dayon ang suspek sa sakyanan sa mga sundalo ug nakuha gikan sa iyang posisyon ang usa ka kalibre .45 nga pistola, mga bala ug usa ka magazine.
Walay papeles ang dala nga armas sa kanhi vice mayor Buisan, hinungdan nga gidakop siya sa Philippine Marines ug gitunol ngadto sa mga pulis.
Sa kasamtangan gisang-at na batok kang Buisan ang kaso nga kalapasan sa Republic Act 10591 o illegal possession of firearms and ammunition. (Edgar Fuerzas)