Expanded Solo Parents Welfare Act daghang nalipay

LUYO sa krisis sa coronavirus disease (Covid-19), giduso karon sa pipila ka mga magbabalaud didto sa Kongreso ang pagpalapad pa sa Expanded Solo Parents Welfare Act nga nagtumong sa dugang benepisyo ug ayuda alang sa mga single parents.

Sumala ni Letecia Acojedo, 46, taga Barangay 31-D, Poblacion, Davao City, nga dako iyang pasalamat ugaling mapanday pa ang dugang kaayohan sa maong balaudnon gumikan dili suma pa lalim ang mamahimong nag-inusarang mobuhi sa mga anak.

"Maayo kaayo ni aron sa ingon matabangan pod mi nga mga solo parents, kay pait kaayo nga ikaw rang usa magbuhi sa imong mga anak," sulti ni Letecia sa pakighinabi sa Superbalita Davao pinaagi sa Messenger sa Facebook Miyerkules, Mayo 6.

Ang inahan sab nga si Kimberly Juarez, 25 anyos, kinsa namatyan og bana, nagbutyag nga mapasalamaton siya ugaling mapanday kini nga balaudnon aron makatabang kaniya sa pagbuhi sa iyang duha ka mga gagmay'ng anak.

"Nag-solo naman lang gyud ko ani nga nagbuhi sa akong mga anak, pait kaayo kay kulangon gyod akong pangita para sa akong mga bata," sulti ni Kimberly sa samang pakighinabi sa Superbalita Davao pinaagi sa messenger.

Mismong si Senator Risa Hontiveros, ang chair sa Committee on Women, Children, Family Relations and Gender Equality, gilayong mihan-ay sa Expanded Solo Parents Welfare Act.

"The pandemic shines a light on what solo parents -- like myself -- already intimately know: that raising a child as a solo parent is infinitely harder in every conceivable aspect than raising a child as a two-parent household. Financial hardships are common among two-income families. The challenge is even more difficult for a solo parent who is forced to rely on one income stream, especially now," ingon sa senadora.

Sumala sa senadora nga ang Expanded Solo Parents Welfare Act of 2020, kun SB 1411, naglangkob niini mao ang 20 percent discount alang sa medical needs sa mga anak, ang mga nag-unang panginahanglanon sa mga bata, diapers ngadto sa 3 anyos, hospital bills sa matag solo parent ug sa anak niini, ug ang tuition fee sa mga anak gikan kindergarten hangtud sa college.

"Bukod sa pag-aalala kung saan sila kukuha ng pangtustos sa pang-araw araw nilang pangangailangan, kailangan din nilang isipin kung sino ang pwedeng takbuhan ng kanilang mga anak kung sakaling sila ay magkasakit o di kaya ay magpositibo sa Covid. Saan sila kukuha ng pangbili ng pagkain? Sino na ang mag-aalaga sa kanilang mga anak?" sumpay ni Hontiveros.

Dugang sa senador, "We will be facing a lot of changes as we transition out of this quarantine. Our solo parents need a 'new normal' that includes them. No one should get left behind." (Jeepy P. Compio)