SI DAVAO City First District Representative Paolo Z. Duterte mipagawas sa iyang pinakaulahing pahimangno batok sa mga giingong fixers nga naggamit sa pangalan sa First Congressional District Office sa ilang mga dautang kalihokan.
Karong bag-o, nakadawat og impormasyon ang batan-ong kongresista nga dunay babaye nga nag-angkon nga empleyado sa maong buhatan ang "nang-recruit" og mga tawo nga nanginahanglan og tabang medikal gikan sa gobyerno pinaagi sa buhatan sa Kongreso.
Ang fixer niingon nga ang buhatan sa kongreso mo-release og P30,000 nga medical assistance diin P3,000 ang automatic nga maadto sa fixer.
Sa pagkadawat sa maong impormasyon, gimandoan dayon ni Rep. Duterte ang iyang mga kawani nga i-report sa kapulisan ang maong impormasyon ug ipa-blotter ang insidente.
"Paludhon nako ni atubangan San Pedro Church duha ka gabii and the appropriate charges will be filed," ingon ni Congressman Duterte.
Giawhag usab niya ang mga Dabawenyo nga i-report dayon sa awtoridad ang bisan kinsa nga nag-angkon nga empleyado sa First Congressional District Office ug nagtanyag niini nga susamang hitabo.
"If naa mahitabo susama ana sa uban, i-report dayon sa police ug sa congressional office sa numerong 09667510792," ingon sa magbabalaod.