KIDAPAWAN CITY - Grabe ang kahimtang sa usa ka construction foreman human gipikhan alas 9:25 sa buntag, Martes, Mayo 25, didto sa Barangay Batulawan, Pikit, North Cotabato.
Giila ang biktima nga si Exodus Namok, 47, minyo ug nagpuyo sa Matina, Davao City.
Matud ni Pikit Chief of Police Major Rolando Dillera nga sakay ang biktima sa usa ka Bongo truck, kauban ang unom pa ka tawo gikan sa Midsayap ug padulong na unta sa Tulunan.
Apan pag-abot nila sa Barangay Batulawan kalit lang kining gitaparan sa riding in tandem suspects ug gipusil gamit ang kalibre .45 nga pistola.
Abtik sab nga miikyas ang mga suspetsado sakay sa motorsiklo
nga walay plaka paingon sa hilit nga dapit sa Pikit.
Gisapupo si Namok sa iyang mga kauban ug gidala ngadto sa
Cruzado Medical Hospital apan sa grabeng igo niini sa likod gibalhin siya sa dakong balay tambalanan sa Kidapawan City.
Wala mamay-ungi sa mga kauban ni Namok ang mga namusil nga giingong pulos dunay face mask sa ilang nawong ug naka-jacket.
Blangko pa ang Pikit Municipal Police Station sa motibo sa pagpamusil sa biktima ug padayon pa silang nag-imbestiga niini. (Edgar E. Fuerzas)