DAVAO DE ORO – Ang lokal nga panggamhanan ning probinsya ubos sa liderato ni Gov. Jayvee Tyron Uy naghatag og pasidungog sa tanang mga frontliners atol sa adlaw sa mga mamumuo kon Labor Day, niadtong Mayo 1, 2020.
Matud pa, lakip nga gihatagan og pasidungog ang ubang mga lumilihok sa probinsya nga nagpadayon sa ilang mga trabaho taliwa sa krisis nga gisagubang tungod sa Covid-19.
Atol sa programa, gidayeg sa probinsyal nga panggamhanan ang dedikasyon sa pagpanerbisyo sa mga frontliners sa panahon nga peligroso ug delikado.
Gihatagan usab og dakong bili sa probinsya ang mga sakripisyo sa mga frontliners dungan sa pag-ila kanila isip mga bulawanong bayani sa probinsya sa Davao de Oro.
Sa pinakaulahing datus, miubos og walo ang ihap sa kaso sa Covid-19 sa tibuok probinsya samtang nagpabiling zero ang probable ug nagpabiling usa ang kompirmado sa virus apan, giingong anaa na sa luwas nga kahimtang. (Dexter T. Visitacion)