ARON mas makatabang pa sa pagsumpo sa coronavirus disease (Covid-19), ang Pilipinas Shell sa Mindanao area mohatag og libre nga gasolina sa duha ka mga hospital partners niini.
Ginganlan og "Para sa Bayan" ang maong proyekto luyo sa nagkataas nga kaso sa Covid-19 sa Mindanao diin gawas sa ilang duha ka hospital partners, mohatag pa gayod sila og fuel discounts alang sa tanang taga Mindanao.
"The health and safety of our people, our customers, and the community are most important to us, and we continue to monitor the situation closely so we can respond to the needs of our kababayans," sumala ni Pilipinas Shell's CEO ug country chairman Cesar Romero.
Dugang niya, "As everyone plays their part in this fight against this pandemic, patuloy ninyong kasama ang Shell sa bawat biyahe ng buhay."
Libre ang gasolina alang sa mga frontliners sa duha ka hospital partners nga mao ang Davao Doctors' Hospital sa Davao City ug ang Polymedic Plaza sa Cagayan de Oro.
Giingon nga pagkahuman sa pag-ila alang sa "mobility challenge" sa lugar o ang kalisud nga nasinatian labi na sa pagbiyahe, ang maong kompaniya mihanyag usab sa ilang mga partners og ayuda diin gawas sa frontliners, ayudahan sab niini ang pang-gas alang sa mga ambulansiya ug ang alang sa nagpadayong relief operations.
Ning kasamtangan, dunay 61 na ka mga gasolinahan sa Shell sa Mindanao nga naghanyag og discounts sa ilang mga diesel products di lamang sa mga frontliners, kon di sa tanan.
Gawas sa mga diskuwento, nanghatag sab sila og mga tubig ug mga food packs sa duol nga mga ospital ug sa mga frontliners, diin gipaningkamotan sab sa kompaniya ang usa ka donation hub sa Davao City aron didto na mahatud ang mga personal protective equipment ug food packs aron dali na lang makuha sa Task Force Davao ug mahatud dayon sa mga ospital.
Ning panahona, prayoridad sa kompaniya ang kaluwasan ug seguridad sa katawhan luyo sa Covid-19.