NAKAPLAGAN na lang nga naghikog ang 17-anyos nga lalaki alas 2:00 sa hapon, Martes, Hulyo 11, 2023, sa Magpet, probinsiya sa Cotabato.
Giila ang biktima nga si John Micho Sacare, estudyante, ug nagpuyo sa Sitio Ambag, Barangay Tagbac, Magpet sa maong probinsiya.
Matud ni Teodora Sacare nga miuli sa ilang balay ang iyang anak nga dunay mga bun-og sa lawas.
Namahayag ang batan-on nga siya gi-bully sa grupo sa mga bayong-bayong unya gitabangan sa pagkulata.
Mismo si John ang misulti sa inahan nga siya walay sala ug gikan kini sa simbahan isip church volunteer ug giatngan sa mga suspek.
Wala lang tagda sa inahan ang anak apan milabay ang usa ka oras dunay nagsulti nga mga silingan niini nga nagbitay na sa punoan sa marang ang estudyante kay naghikog.
Nadala pa sa balay tambalanan si John apan gideklara siya sa doktor nga dead on arrival.
Nagmahay ang inahan sa biktima kay kung iya pa unta nga gipaminaw ang reklamo sa anak dili unta kini makahukom nga maghikog.
Hustisya ang singgit sa pamilya sa biktima batok sa mga nag-bully kaniya ug nagkulata.
Kapulisan sa Magpet Municipal Police Station nagsubay na sa maong hitabo.
Kung duna kamo'y nasayrang nakasinati og depresyon ug kinahanglan nga dunay ma-istorya, ayaw pagduha-duha og pangayo og tabang. Ania ang Hopeline ug National Center for Mental Health Crisis Hotline sa Pilipinas: Hopeline PH's 24/7 hotlines: 0917-558-4673 (Globe) 0918-873-4673 (Smart) 02-88044673 (PLDT) 2919 (toll-free for Globe and TM). Sa National Center for Mental Health Crisis Hotline makontak sa 0917-899-8727 ug sa 0917-899-USAP/989-8727/989-USAP. Edgar E. Fuerzas