GIPAILAWOM na sa psychosocial intervention ang 21-anyos nga lalaki kinsa gikatahong usa ka ambulance crew nga taga Barangay Matina Crossing, Davao City human kini naluwas sa kapulisan sa San Pedro Police Station.
Nasayran nga niadtong Miyerkules sa tungang gabii, Hulyo 13, 2022, namatikdan sa mga residente sa Bryco, Barangay 5-A, Bankerohan nga dunay usa ka lalaki nga nagtindog ibabaw daplin sa tulay nga mosuway og ambak.
Gilayong nanawag og kapulisan ang mga residente, lakip ang Central 911 kinsa daling miresponde sa Governor Generoso Bridge sa Bankerohan.
Hinuon, pag-abot sa awtoridad, nagpatuo ang maong lalaki diin wala kini nakadayon sa iyang dautang plano.
Daling gihatagan og pasiunang interbensiyon ang maong lalaki kinsa gikatahong nasubo pag-ayo human giingong gibulagan og uyab, suma sa San Pedro police.
Kung duna kamo'y mga gihambin sa galamhan ug nanginahanglan og tawo nga maistoryahan sa inyong gidala nga kasubo, ug uban pang mga mental health crisis, puwede kamo nga motawag sa National Center for Mental Health, 0917-899-8727 (USAP), 7989-8727 (USAP) naa sab ang Hopeline, 0917-558-4673; 0918-873-4673; 8804-4673 2919 (toll-free for Globe and TM). (Jeepy P. Compio)