PADAYON nga gipatuman ang gun ban dinhi sa dakbayan sa Davao sugod Enero 1, 2020 hangtud Disyembre 31, 2020 human kini naaprobahan sa national headquarters sa Philippine National Police (PNP).
Base sa memorandum gikan sa Police Regional Office (PRO) Davao Regional Operations Management Division pinetsahan Enero 7, tanang Permits to Carry Firearms Outside of Residence (PTCFOR) gisuspende sud sa usa ka tuig sa Davao City nga niepekto gikan alas 12 sa kaadlawon niadtong Enero 1 hangtud alas 11:59 sa gabii sa Disyembre 31.
Kini isip tubag sa resolsuyon nga gipasar sa Konseho sa dakbayan nga nagrekomendar sa pagpadayon sa “gun ban” dinhi isip kabahin sa security measures karon nga ang martial law napupos na niadtong Disyembre 31, 2019.
Ang memo nagbutyag nga kadto lang mga miyembro sa PNP, Armed Forces of the Philippines (AFP) ug ubang law enforcement agencies (LEAs) kinsa naghimo sa ilang opisyal nga trabaho sa ahensiya gamit ang ilang uniporme gitugotan nga magbitbit og mga armas.
Tanang mga provincial directors sa nagkadaiyang Police Provincial Offices (PPOs), City Director sa Davao City Police Office (DCPO), ug Force Commander sa Regional Mobile Force Battalion (RMFB) Davao gimandoan nga ipakatap ang impormasyon sa nagkadaiyang media outlet aron mapahibawo ang publiko ilabi na sa mga nagbaton og armas.
Si DCPO spokesperson Captain Rose Aguilar nagsulti nga ilang ipatuman kini subay sa konsepto nga Enhanced Managing Police Operations sa pagpakig-alayon uban sa AFP, ubang LEAs ug local government units (LGUs).
Bahin niadtong dunay shoot fest dinhi o kadtong mga nanag-iya og pusil kinsa nagtinguha nga magbitbit sa ilang armas gawas sa ilang balay, gitambalan ni Aguilar nga kinahanglan nga mokuha sila og permit to transport sa Regional Civil Security Units (RCSU) Davao nga naa sa sulod sa Police Regional Office (PRO) Davao headquarters sa Catitipan, Davao City.
Ang permiso magbutang sa oras, lugar kon diin kini dalhon ug tumong sa hangyo.
Kung ugaling madakpan sila atol sa checkpoint ug napakyas sa pagpresentar sa gikinahanglan nga dokumento, kasohan sila sa kalapasan sa gun ban. (Juliet C. Revita)