Haya sa pamilyang natabunan sa landslide gibisita ni Duterte

Haya sa pamilyang natabunan sa landslide gibisita ni Duterte
Hulagway gikan sa Municipality of Monkayo Facebook page

DAVAO DE ORO -- Si Vice President ug Department of Education Secretary Sara Duterte nibisita sa haya sa usa ka pamilya nga nangamatay human natabunan sa landslide sa Purok 20, Pag-asa, Mt. Diwata, Diwalwal, Monkayo, Davao de Oro alas 2 sa hapon, Huwebes, Enero 18, 2024.

Enero 20, 2024 si Duterte nakig-istorya kang Mayor Manuel "Way Kurat" Zamora sa haya sa Assembly of God Church, Barangay Union, Monkayo.

Nagpadangat og pahisubo si Duterte sa mga kabanay sa mga biktima sa nahitabong trahedya, ilabi na sa pamilyang Gumatin diin nahurot ang tibuok pamilya og kamatay.

Sa Facebook post sa Municipality of Monkayo, kauban ni Duterte si Zamora sa paghatag og mga ayuda alang sa pamilya sa mga biktima.

Gitunol ni Duterte ang 12 ka sako nga bugas ug cash assistance ngadto sa mga kabanay.

Mipaambit sab og mubo nga pag-ampo ang Bise Presidente alang sa mga namatay.

Subay sa gipagula sa awtoridad nga mga pangalan sa mga biktima, ang mga namatay nailhang sila Gumatin Catherine, 27-anyos; Gumatin Hannah, 9-anyos; Gumatin Dysna, 3-anyos; Gumatin Arjay, 1-ka tuig; Gumatin Cristelle, 10-anyos; Gumatin Ailee, 8-anyos ug Nenaria, Marjomie, 33-anyos.

Ang upat ka mga na-missing nailhang sila, Gumatin Rommil, 36-anyos; Bitoon Agnes, 44-anyos; Saldua Elvera, 35-anyos; ug Riboldad Ritchel, 35-anyos.

Mga nakalingkawas ug samdan nailhang sila Cruda Dexter, 19-anyos; Cruda Bernadeth, 51-anyos; ug Delola Amara Kate, 1-ka tuig.

Sa Davao City, patay sab ang usa ka Ernesto Basites Pacinio, 43-anyos, residente sa Purok 5, Tigatto human nga nadahilian og yuta alas 8:10 sa gabii diin laing duha samaron nga anaa sa Southern Philippines Medical Center (SPMC).

Patay sab ang usa ka 7-anyos nga bata samtang samdan ang iyang mga ginikanan atol sa nahitabong landslide alas 9 Huwebes sa gabii, Enero 18, 2024, sa Sitio Calachuchi, Brgy. Salaysay, Marilog District.

Giila sa Marilog Police Station ang biktima mao si Jeron Manay, residente sa maong lugar.

Sumala ni Salaysay Barangay Kapitan Roberto Itdang nga layo ang lugar nga gipuy-an sa maong pamilya, anaa sa 19 kilometros ang kalayo gikan sa police station, walay internet connection ug signal ug wala say kuryente.

Ang ginikanan sa biktima nadala sa SPMC aron mahatagan og medical nga atensiyon. (Jeepy P. Compio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph