MAGUINDANAO -- Naresolba na ang dugay na kaayo nga dumot sa magkaaway nga pundok sa probinsiya sa Maguindanao.
Nagdesisyon ang grupo sa Moro Islamic Liberation Front (MILF) nga gipangulohan ni Kumander Basur Sagan ug ni Kumander Ernie Kalim sa special Citizen Armed Force Geographical Unit (Cafgu) nga tapuson ang ilang dumot sa utlanan sa Datu Paglas ug Pandag Maguindanao.
Tumong sa duha ka magkaaway nga grupo nga i-pursige ang Bangsamoro Organic Law (BOL) alang sa mugnaon nga Bangsamoro Autonomous Region in Muslim Mindanao (BARMM) nga hulip sa Autonomous Region in Muslim Mindanao (ARMM).
Sumala kang Pandag Mayor Bai Zihan Mamalinta-Mangudadatu, nga dili makab-ot ang gilaom nga kalinaw ug kalambuan sa ilang dapit kung magpadayon ang pinatyanay sa magkaaway nga grupo.
Kinahanglan nga hiusahon ang mga Moro aron aghaton ang uban pa nga mga armadong grupo nga biyaan ang pakig-giyera ug suportahan ang BOL.
Milagda ang grupo nila Kumander Basur Sagan ug Kumander Ernie Kalim sa usa ka kasulatan nga tapuson na ang ilang dumot ug maghiusa alang sa kalinaw.
Ang maong rido settlement ang gipangunahan sa 33rd Infantry Battalion ug 6th Infantry (Kampilan) Division Philippine Army. (Edgar Fuerzas)