NANAWAGAN karon og hustisya ang pamilya sa 28-anyos nga kanhi contestant sa "Tawag ng Tanghalan" sa ABS-CBN kinsa napalgang wala nay kinabuhi kilid sa sapa sa Purok Masagana, Sitio San Isidro, Barangay New Clarin, Bansalan alas 4 sa hapon niadtong Dominggo, Oktubre 23, 2022.
Sumala sa pamilya nga dili pa sila kampante sa inisyal nga imbestigasyon sa Bansalan Municipal Police Station sanglit ang giingong nalumos kini, dili sila makatuo human dunay mga bun-og sa lawas, ug wala man lang miburot ang tiyan kon nalumos.
Tungod niini, usa ka makuti nga imbestigasyon karon ang gihimo sa Bansalan Municipal Police Station sa kamatayon sa biktimang si Arnold Masamloc, kinsa nakit-an sa usa ka Lydia Agdan didto sa sagbutan nga bahin kilid sa sapa.
Nasayran nga ulahing nakit-an ang biktima sakay sa iyang motor gikan suma pa naghatud og pasahero, apan wala na kini kauli sa ilang balay sa Matanao.
Si Masamloc nailhan human miapil sa "Tawag ng Tanghalan" sa Showtime sa ABS-CBN niadtong Marso 2019.
Padayon ang gihimong imbestigasyon sa kapulisan sa maong hitabo.