HUSTISYA karon ang singgit sa mga opisyales sa Barangay Baganihan sa Marilog, Davao City sa pagpatay sa ilang kagawad ug Indigenous Person Mandatory Representative (IPMR), kinsa pulos nga gipangpusil sa Sitio Bagong Silang, Barangay Baganihan, Marilog District, Davao City niadtong Sabado, Hulyo 1, 2023.
Sa taho gikan sa Davao City Police Office (DCPO), mga biktima giila nga sila si Kagawad Joel Siawan, 37, ug Indigenous Person Mandatory Representative (IPMR) Ernesto Matalam, 52, kinsa pulos gipatay sa lugar. Sila mga molupyo sa Sitio Namnam, Barangay Baganihan sa Marilog.
"Among kasakit ug kasubo sa pagpatay sa atong halangdon na Kagawad Joel Siawan ug IPMR Datu Ernesto Matalam. Gikondena nato ang brutal na pagpatay kanila. Hustisya ang gipangita sa ilang kamatayon," sumala sa pahayag sa barangay nga gi-post sa ilang official Facebook page.
Miapela sab ang barangay ngadto sa mga tigbalita ug publiko nga angay'ng "sensitive and responsible in their comment on social media."
"Dili ta mohatag og maling impormasyon ug makadungag og kasakit na gibati sa mga hingtungdan na pamilya ug modungag og mga statements na makapasuko sa katawhan. Ug walay matabang financially o physically pwede ra mga pag-ampo," matud pa niini.
Alas 10 sa buntag niadtong Sabado, sila si Siawan ug Matalam, uban sa lain pang mga kaubanan nihimo og tribal ritual sa luna nga nahimutang sa dapit, ug padulong na unta sa National Highway sa dihang ang duha ka mga biktima gipamusil.
Ang bansagon sa mga mamumuno wala pa mailhi apan kapulisan kasamtangang milusad og hot pursuit operation.(RGL)