UPAT ka mga probinsiya sa Davao Region ubos gihapon sa Alert Level 2 sa Covid-19 hangtud Abril 30, 2023, sumala sa Inter-Agency Task Force for the Management of Emerging Infectious Diseases (IATF).
Subay sa IATF Resolution No. 6-C pinetsahan og Abril 14, 2023, kini nga mga probinsiya mao ang Davao de Oro, Davao del Norte, Davao del Sur, ug Davao Occidental.
Apan dunay pipila ka mga munisipyo nga wala malakip sa Alert Level 2 status, nga mao ang Davao City; Mawab, Montevista, Nabunturan, New Bataan sa Davao de oro; Braulio E. Dujali, Island Garden City of Samal, ug Sto. Tomas sa Davao del Norte; Padada sa Davao del Sur; Don Marcelino, Malita, ug Santa Maria sa Davao Occidental.
Gikanayon sa nasudnong Department of Health (DOH) nga mga lugar nga ubos sa Alert Level 2 wala mikatag gikan sa Alert Level 1, inay namentinar ang ilang Alert Level 2 status sukad Hunyo 2022.
Bisan og duna silay ubos nga mga kaso sa Covid-19, ang alert status nagpasabot nga mga lugar dunay ubos nga vaccination rates nga ubos sa 70 porsiyento sa target nga "population and/or A2 senior citizen" nga populasyon.
"Meeting these targets will allow these areas to be de-escalated to Alert Level 1," matud sa DOH.
Ang kinatibuk-ang "coverage" sa target population alang sa fully vaccinated nga indibiduwal naa sa 88.3 porsiyento alang sa tibuok rehiyon sukad Marso 10, base sa datus sa regional DOH (DOH-Davao). Kini kaparehas sa 3,353,416 ka indibiduwal.
Ang coverage alang sa A2 population naa sab sa 65.8 porsiyento samtang ang 700,025 indibiduwal nakadawat sa ilang mga booster doses.
Sa samang higayon, ang Davao Region dunay 456 ka bag-ong mga kaso sa Covid-19 sa katapusang 14 ka adlaw, nanguna ang Davao City uban ang 356 ka mga kaso.
Mitala sab ang Davao de Oro og 17 ka kaso, Davao del Norte dunay 22, Davao del Sur niabot og 31, ug Davao Oriental dunay 17 ka kaso.