SUB-GROUP sa mga terorista ang nagtanum og usa ka improvised explosive device (IED) daplin sa kalsada alas 5:00 sa hapon, Sabado, Hunyo 18, sa Pikit, Cotabato Province.
Gibutyag ni 602nd Brigade Commander Brigadier General Donald Gumiran nga nakadawat og impormasyon ang mga sakop sa 90th Infantry (Bigkis-Lahi) Battalion, Philippine Army gikan sa mga sibilyan sa gidudahan nga karton nga gibilin daplin sa kalsada sa Sitio Proper, Barangay Inug-ug, Pikit.
Abtik nga nagresponde ang puwersa 90th IB, uban ang 33rd Explosive and Ordnance Disposal Company.
Gihulagway sa EOD Team nga IED sa karton gigama gamit ang usa ka Projectile sa 105mm High Explosive Ammunition nga dunay electronic wires ug 9 volts battery.
Gipatuman dayon ang safety measures pinaagi sa pag-cordon sa dapit ug abtik nga nagpahigayon og clearing operations ang militar.
Gisirado ang kalsada ug gi-abrihan human nadepyos sa EOD team ang bomba.
Kahinumdoman nga gibombahan sa mga miyembro sa Bangsamoro Islamic Freedom Fighters (BIFF) ang transmission tower sa NGCP sa Barangay Batulawan sa Pikit niadtong miaging mga adlaw.
Tungod niini, gipalig-on pa sa militar ug kapulisan ang pagbantay sa mga dapit nga posibleng punting sa mga terorista.