Inahan taga Tagum City namatay atol sa linog

Surprisa napalyar tungod sa hitabo
Kini ang pader nga nahugmak human sa linog diin asa ang biktimang si Kenneth Joy Gemarino ang naigo sa semento.
Kini ang pader nga nahugmak human sa linog diin asa ang biktimang si Kenneth Joy Gemarino ang naigo sa semento.Hulagway pinaagi ni Dexter T. Visitacion.

DAVAO DEL NORTE — Napalyar ang surprisa nga unta isulti sa batan-ong babaye ngadto sa iyang kapuyo sanglit, ang maong surprisa napakgang sa makusog nga linog sa Purok 3, Brgy. La Filipina, Siyudad sa Tagum, Sabado sa gabii, Disyembre 2, 2023. 

Gibutyag sa usa sa mga higala sa biktima na wa magpabutyag sa iyang pangalan, nga ang biktima nga si Kenneth Joy Gemarino, molupyo sa nahisgutang dapit, nagsabak sa ikaduha anak sa iyang kapuyo nga si John Ryan Martir, apan ang mao niyang kapuyo wa pa masayod sanglit, buot sa biktima nga surprisahon kini.

Matud pa nga sa dihang nahitabo ang linog ang biktima uban ni John Ryan ug sa anak nila nga 6-anyos dali-daling nanggawas gikan sa sulod sa balay apan, sa ilang paggawas nahugno ang pader duol sa ilang gitindugan nga dunay gitas-on nga 15 feet.

Sumala pa nga naigo sa nahagsa nga pader ang ulo sa biktima ug ang bana niini nasamdan sab sa kamot ug ubang parte sa lawas samtang ang 6-anyos nga anak wala maunsa.

Gidali pagdala ang mga biktima sa Christ the King Specialist Hospital aron nga matambalan apan, ang biktima nga si Kenneth Joy gideklarang dead on arrival.  

Nasayran nga ang pader nga nahugmak karaan na ug gituohang maoy hinungdan sa hinanali niining pagkahugmak.

Sa paghagpat ning maong balita ang patay’ng lawas sa biktima atoa pa sa morgue sa nahisgutang balay-tambalanan samtang ang bana niini padayon pang gitambalan.

Mall apektado

Gawas sa maong hitabo apektado sab sa linog ang dagkong Mall sa siyudad sa Tagum, nasayran nga nangabuak ang salamin ug pipila ka mga paninda sa grocery department ang nangahagbong sa salog nga ang ubang de botelya nangabuak sab.

Sa lungsod sa New Corella sa samang probinsiya, gisaysay sab sa negosyanteng si Evelyn Cruz Sitoy pinaagi sa iyang Facebook page nga nangatumba ug nangabuak ang pipila ka mga gamit sulod sa simbahan sa lungsod hinungdan nga ang misa pagka-Dominggo sa gawas sa simbahan gipahigayon.

Samtang  sa probinsiya sa Davao de Oro, nga tungod gihapon sa maong linog, usa sab ka balay ang nahugno didto sa Knew way Homes Subdivision, sa Lungsod sa Montevista.

Hinuon wa’y gikatahong nasamdan o naangol sa pagkahugno sa maong balay.

Apektado sab sa linog ang Grocery Store ni BM Eutropio “Topoy” Jayectin  nga nahimutang sa Brgy. Poblacion human, nangahagbong ang mga paninda labi na ang mga de botelya paninda.

Sa Lungsod sa Monkayo, gilayong gi-suspende sa lokal nga panggamhanan ang klase sa tanang school levels sa adlaw’ng Lunes kini aron mahatagan og kahigayonan nga masiguro nga luwas ang tanang mga estudyante ug mga magtutudlo.

Atol sa pagsuwat ning maong balita, ang ubang mga lungsod wa pa magpaguwa og pagpahibalo lakip ang lokal nga panggamhanan sa probinsiya sanglit, giingon nga gipaabot pa ang resulta sa gihimong pagsusi sa Provincial Disaster Risk Reduction Management Office.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph