GIBUTYAG sa grupo sa LGBTQ+ sa Davao City nga naglisud sila nga matapok ang nagkadaiyang sektor nga makatabang sa pagmugna sa implementing rules and regulations (IRR) sa Anti-Discrimination Ordinance sa dakbayan.
“We’ve been pushing for the IRR since 2015. There were approaches and attempts to different sectors. Unfortunately, hindi siya ma-convene-convene,” butyag ni Oscar Obenza Jr., representante sa LGBT Davao City Coalition Inc. atol sa Kapehan sa Davao media forum, Lunes, Hunyo 19, 2023.
Gimando ang Executive Ordinance No. 0417-2012 o ang Anti-Discrimination Ordinance of Davao City niadtong 2012 ug giamendahan niadtong 2018.
Nagdeklara kini sa mga lihok ug paglusad og diskriminasyon base sa "sex, gender identity, sexual orientation, race, color, descent, national or ethnic origin, and religious affiliation or beliefs" isip di maki-angayon.
Ang LGBTQ+ community, nga maoy umbrella term nga nagrepresenta sa lesbians, gays, bisexuals, transgender, ug uban pang queer persons, nakasianti gihapon og diskriminasyon bisan pa sa pagkamugna sa Anti-Discrimination Law.
Matud ni Obenza nga ang hagit mao nga ang mga taho sa diskriminasyon wala saktong matala ug mahatagi og pagtagad. Hinuon, bisan pa niini, gisulti ni Obenza nga ang komunidad wala naghatag og prayoridad sa pagmugna og lahi nga ordinansa nga magtutok sa diskriminasyon batok sa LGBTQ+.
“That would be ideal but dito sa Davao, mas gusto ang inclusive na batas, hindi specific sa isang sector so we are eyeing more on our existing law that would add to the protection of the LGBT community,” pagtin-aw niya.
Pabilin ang LGBTQ+ community sa Davao City nga manguna sa plano nga tapukon og balik ang nagkadaiyang sektor subay sa kasaulogan sa Pride Month karong Hunyo ug malaumon nga mahan-ay na ang IRR. (ICM)