DAVAO DEL SUR -- Usa ka job order nga kawani nga nadestino sa Municipal Disaster Risk Reduction and Management Council (MDRRMC) sa lungsod sa Hagonoy ang nasikop atol sa drug bust niadtong Martes, Disyembre 18.
Si Senior Superintendent Allan Manibog, Davao del Sur Police Provincial Office director, nagbutyag nga banda alas 4 sa hapon, gihikay sa Philippine Drug Enforcement Agency (PDEA), Provincial Intelligence Branch (PIB) ug Hagonoy Municipal Police Station ang drug bust didto sa Purok Caimito, Barangay Paligue sa lungsod.
Nasikop ang bag-ong naila nga high-value target (HVT) ning bulan sa Disyembre nga si Edilberto Omole, 34, residente sa Purok 10, Guihing, Hagonoy.
Matud ni Manibog nga nakuha sa posisyon sa suspek ang upat ka gagmay'ng sachet sa gituohang shabu, marked money nga P500, Samsung cellular phone, MDRRMC ID, ug kolor itom ug puti nga Honda XRM motorsiklo nga way plaka.
Samtang, banda alas 7:30 sa gabii, laing drug bust ang gihikay sa samang grupo sa mga awtoridad nga miresulta sa pagkasikop ni John Rey Alcazaren Casa, 43, molupyo sa Purok 13, ug usa ka Clint Kid Casas Tantiado, 24, pulos ulitawo, molupyo sa Purok 1, Barangay Lapulabao sa nahisgutang lungsod.
Nakuha sa posisyon ni Casa ang pito ka managlahing sachet sa gituohang shabu, mga shabu paraphernalia ug Honda XRM motorsiklo.
Gidason ni Manibog nga sa posisyon ni Tantiado nakuha sab ang upat ka sachet sa gituohang druga, marked money nga P500 ug paltik nga kalibre .357 pistola, ug usa ka nagamit na nga linikit nga marijuana.
Mga suspek gipadlak na sa selda sa kapulisan samtang gihikay ang kasong paglapas sa Republic Act 9165 o nailang Comprehensive Dangerous Drugs Act of 2002. (Orlando B. Dinoy)